Keni vendosur të hapni biznesin tuaj në Shqipëri. Mundësia është e qartë. Por sistemi është i panjohur dhe nuk dini nga të filloni.
Ky është momenti kur shumë investitorë dhe profesionistë të huaj ngecin, jo nga mungesa e vullnetit, por nga mungesa e informacionit.
Ky artikull është shkruar pikërisht për ju. Do të gjeni këtu çdo procedurë të rëndësishme, dokumentacionin e nevojshëm dhe afatet kohore, të gjitha të organizuara si udhëzues praktik.
Asnjë Kufizim: Shqipëria Mirëpret Investitorët e Huaj
Një nga keqkuptimet më të shpeshta është se shtetasit e huaj kanë kufizime ligjore për të hapur biznes në Shqipëri. Realiteti është i kundërt.
Ligji shqiptar nuk i diskriminon investitorët e huaj. Ju mund të jeni pronar i 100% të aksioneve të një shoqërie me përgjegjësi të kufizuar (Sh.p.k.) pa asnjë kërkesë për të pasur partner lokal. Mund të jeni administrator i vetëm, mund të hapni degë ose zyrë përfaqësuese dhe mund të tërhiqni kapitalin e fitimet lirisht jashtë vendit dhe mund të regjistroni një person fizik në emrin tuaj.
Shqipëria ka nënshkruar marrëveshje mbi mbrojtjen e investimeve të huaja me dhjetëra shtete dhe legjislacioni për investimet strategjike ofron garanci shtesë për projektet e mëdha.
Çdo investim i huaj gjeneron vende pune, transferon njohuri dhe kontribuon në rritjen e ekonomisë. Ky është edhe qëndrimi i politikave tatimore të fundit, siç do ta shihni më poshtë.
Leggi anche: Si regjistrohen bizneset e huaja në Shqipëri.
Cilën Formë Ligjore të Zgjidhni
Para çdo hapi tjetër, duhet marrë një vendim i rëndësishëm: do të veproni si person fizik apo do të hapni një shoqëri me përgjegjësi të kufizuar (Sh.p.k.)?
Zgjedhja ndikon drejtpërdrejt në rrezikun personal, në mënyrën e taksimit dhe në fleksibilitetin e ardhshëm të biznesit. Nga praktika jonë, tre faktorë e përcaktojnë vendimin.
Numri i Ortakëve
Nëse biznesi ka vetëm një pronar, të dyja format janë ligjërisht të mundshme. Nëse ka dy ose më shumë pronarë, e vetmja rrugë është Sh.p.k. Personi fizik regjistrohet vetëm nga një individ dhe nuk mund të ndahet zyrtarisht me ortakë të tjerë.
Rreziku dhe Mbrojtja e Pasurisë Personale
Si person fizik, ju dhe biznesi juaj jeni një e vetme përpara ligjit. Nëse biznesi grumbullon detyrime tatimore, fatura të papaguara ose hua, kreditorët kanë të drejtë të ndjekin pasurinë tuaj personale: llogarinë bankare, automjetin, apartamentin.
Sh.p.k., siç e tregon vetë emri, kufizon përgjegjësinë. Ju garantoni dhe jeni përgjegjës vetëm deri në shumën e kapitalit të investuar. Pasuria personale mbetet e mbrojtur.
Për veprimtari me rrezik të ulët, si shërbime profesionale, konsulencë ose veprimtari të thjeshta tregtare, personi fizik është shpesh zgjidhja e duhur. Për aktivitete me ekspozim më të lartë financiar ose ligjor, Sh.p.k. ofron mbulesën e nevojshme.
Dallimet në Taksa
Ky është aspekti më i keqkuptuar. Dallimet tatimore ndërmjet dy formave janë minimale.
Tatimi mbi fitimin, TVSH-ja, sigurimet shoqërore dhe shëndetësore, fiskalizimi: të gjitha këto detyrime janë identike si për personin fizik ashtu edhe për Sh.p.k.-në. Diferenca e vetme ka të bëjë me tatimin mbi dividendin.
Kur një shoqëri shpërndan fitimin tek ortakët, kjo shpërndarje tatohet me normën 8%. Ky tatim aplikohet vetëm në momentin e pagesës së dividendit. Nëse fitimi qëndron brenda llogarisë së shoqërisë dhe nuk shpërndahet, tatim mbi dividendin nuk ka.
Personi fizik nuk ka këtë shtresë tatimi, sepse nuk ka entitet juridik të veçantë.
Rezidenca Fiskale: Çfarë Duhet të Dini si Shtetas i Huaj
Ky aspekt meriton vëmendje të veçantë dhe shpesh anashkalohet.
Sipas nenit 8 të Ligjit nr. 29/2023 “Për tatimin mbi të ardhurat”, çdo person që qëndron në Shqipëri mbi 183 ditë brenda vitit tatimor bëhet rezident fiskal shqiptar. Si rezident fiskal, ai deklaron dhe paguan tatim në Shqipëri mbi të ardhurat e tij në nivel global, jo vetëm mbi ato të gjeneruara nga biznesi shqiptar.
Ky rregull ka implikime të rëndësishme. Nëse jeni investitor me të ardhura edhe nga vende të tjera dhe planifikoni të jetoni gjatë në Shqipëri, ndryshimi i rezidencës fiskale duhet planifikuar me kujdes. Shqipëria ka marrëveshje për shmangien e tatimit të dyfishtë me shumë shtete, por çdo situatë ka specifikat e saj.
Çdo shtetas i huaj, para se të marrë vendimin përfundimtar mbi formën ligjore dhe rezidencën, duhet të konsultohet me specialistë për të vlerësuar rrethanat konkrete.
Leggi anche: A duhet të regjistrohem si person fizik apo si shoqëri ?
Si Hapet Biznesi: Prokura e Posaçme
Kur një shtetas i huaj dëshiron të hapë biznes në Shqipëri pa u paraqitur fizikisht gjatë gjithë procesit, zgjidhja më praktike dhe me kosto minimale është lëshimi i një prokure të posaçme.
Prokura e posaçme është një akt noterial me të cilin autorizoni një person të besuar në Shqipëri, i cili disponon nënshkrim elektronik dhe llogari aktive në platformën e-Albania, të kryejë veprimet e regjistrimit dhe të aplikojë në emrin tuaj pranë institucioneve shtetërore.
Kostoja totale është rreth 50 Euro dhe përfshin tarifën noteriale dhe shërbimin e përkthimit. Noteri harton dhe firmos vetëm dokumentet në gjuhën shqipe. Nënshkrimi juaj vendoset mbi dokumentin shqip, ndërsa përmbajtja ju lexohet nga një përkthyes i licencuar gjatë sesionit noterial.
Prokura e posaçme i jep personit të autorizuar të drejtën të dorëzojë statutin dhe aktin e themelimit të nënshkruar nga vetë themeluesi, të nënshkruajë çdo dokument tjetër ligjor të nevojshëm gjatë procesit të regjistrimit dhe të ndjekë procedurat pranë organeve shtetërore deri në përfundim.
Pse Prokura e Posaçme është Rruga më e Sigurt ?
Dikush mund të pyesë nëse prokura mund të shmanget nëse administratori vjen vetë në Shqipëri. Ligjërisht po. Por ka një arsye praktike vendimtare.
Për të marrë lejen unike, shtetasi i huaj duhet të ketë tashmë një status të qartë: të jetë i punësuar nga një shoqëri e regjistruar, ose të jetë ortak dhe administrator i saj. Por biznesi nuk mund të hapet pa dikë që nënshkruan fizikisht në Shqipëri. Leja unike, nga ana tjetër, nuk mund të merret para se biznesi të jetë i hapur dhe statusi i pronarit ose punëmarrësit të jetë i vendosur.
Zinxhiri është i qartë. Biznesi hapet i pari. Pastaj shtetasi i huaj caktohet si ortak ose nënshkruan kontratën e punës. Vetëm pas kësaj aplikon për lejen unike ndërkohë që ndodhet jashtë Shqipërisë, siç e kërkon ligji.
Rruga e rekomanduar është të caktoni me prokurë të posaçme një shtetas shqiptar me nënshkrim elektronik dhe llogari aktive në e-Albania. Ai kujdeset për hapjen e biznesit dhe dokumentacionin e nevojshëm, ndërkohë ju aplikoni për lejen unike nga jashtë.
Nëse Prokura Nënshkruhet Jashtë Shqipërisë
Nëse nuk keni mundësi të paraqiteni pranë një noteri shqiptar, prokura e posaçme mund të nënshkruhet pranë një noteri jashtë vendit. Në këtë rast, dokumenti duhet të pajiset me vulën apostile sipas Konventës së Hagës të vitit 1961, e cila vërteton autenticitetin e nënshkrimit të noterit të huaj.
Pas apostiles, dokumenti duhet të përkthehet ligjërisht në gjuhën shqipe nga një përkthyes i licencuar dhe të paraqitet me të dyja kopjet, origjinalin dhe përkthimin, pranë noterit shqiptar ose autoriteteve përkatëse.
Ky rrugëtim është pak më i gjatë dhe me kosto shtesë, por mbetet plotësisht i mundshëm dhe zbatohet rregullisht nga investitorë të huaj nga e gjithë bota.
Shembulli i nje prokure:
PROKURË E POSAÇME
Sot me datë (dymijë e njëzet ) para meje Noter ___________, i/e regjistruar/e pranë _ me _ në zyrën noteriale të ndodhur në ____, u paraqit personalisht i/e interesuari/a i/e cili/a kërkoi hartimin e kësaj prokure me përmbajtje si vijon:
I/E PËRFAQËSUARI/A: atësia , i/e lindur/ur në , me datë dhe banues/e në _, , ___, madhor/e dhe me zotësi të plotë juridike për të vepruar, i/e identifikuar/e me , nr. ___, me datë lëshimi _, i/e cili/a kërkoi redaktimin e kësaj prokure në bazë të ____, dhe deklaroi se:
Emëroj si përfaqësues ligjor dhe të posaçëm z./znj. _ atësia _ lindur në __, Shqipëri, më _ dhe banues/e në ______; madhor/e me zotësi të plotë juridike dhe për të vepruar, i/e identifikuar/e me anë letërnjoftimit me nr. personal _, të cilit/cilës i jap tagra dhe kompetenca të plota ligjore të më përfaqësojë pranë Qendrës Kombëtare të Biznesit (QKB) për të kryer të gjitha procedurat ligjore për regjistrimin e shoqërisë me përgjegjësi të kufizuar (sh.p.k.) ose si person fizik, ku unë do jem administrator/e i/e saj.
Përfaqësuesi ligjor ka të drejtë dhe kompetenca të plota ligjore të nënshkruajë çdo dokument ligjor që nevojitet për themelimin dhe regjistrimin e shoqërisë.
Përfaqësuesi ligjor ka të drejtë dhe kompetenca të plota ligjore të dorëzojë statutin dhe aktin e themelimit, të nënshkruar nga vetë themeluesi, si dhe të ndjekë të gjitha procedurat ligjore deri në regjistrimin e plotë të shoqërisë.
Përfaqësuesi ligjor ka të drejtë dhe kompetenca të plota ligjore të paraqitet pranë çdo institucioni shtetëror për të dorëzuar dhe tërhequr dokumentet ligjore deri në realizimin e qëllimit të kësaj prokure.
Kjo prokurë ka shtrirje afati kohor deri në realizimin e qëllimit apo revokimin e saj me akt noterial.
Veprimet e kryera prej përfaqësuesit ligjor i konsideroj që nga ky moment të pranuara dhe të mirëqena brenda kufijve ligjorë, sikur i kam kryer vetë personalisht.
I/E PËRFAQËSUARI/A: _____________ [nënshkrimi]
Hapja e Llogarisë Bankare
Bankat në Shqipëri kanë shtuar kërkesat e tyre për identifikim dhe verifikim të burimit të fondeve, në përputhje me rregullat ndërkombëtare kundër pastrimit të parave. Procesi i hapjes së llogarisë bankare si shtetas i huaj kërkon parapërgatitje.
Shumë banka sot kërkojnë jo vetëm dokumentacionin standard, por edhe lejen unike ose të paktën konfirmimin e aplikimit për të. Kjo ka bërë që koordinimi i hershëm me bankën të jetë i domosdoshëm.
AlProfit Consult ndihmon klientët e saj gjatë këtij procesi. Komunikojmë drejtpërdrejt me bankën, depozitojmë paraprakisht të gjitha dokumentet e nevojshme dhe marrim konfirmimin se dosja është e plotë. Vetëm pasi banka konfirmon se gjithçka është gati, klienti vjen fizikisht për të nënshkruar. Kjo i shmanget udhëtimeve të panevojshme.
Sa Zgjat i Gjithë Procesi
Me dokumentacion të plotë dhe parapërgatitur, afatet janë konkrete.
Hapja e shoqërisë zgjat 2 deri në 3 ditë pune dhe përfshin regjistrimin në QKB, marrjen e NIPT-it dhe publikimin në Regjistrin Tregtar.
Hapja e llogarisë bankare, regjistrimi tatimor dhe përgatitja për fiskalizim zgjat 1 deri në 2 javë dhe përfshin regjistrimin pranë Drejtorisë Rajonale Tatimore, aktivizimin e sistemit të fiskalizimit nëse zbatohet si dhe hapjen e llogarisë bankare.
Disa procese mund të zgjaten nëse ka vonesa nga bankat ose institucionet publike, por me dokumentacion të plotë rrallë ndodh kjo.
Leja Unike: Çfarë Është dhe Kur Nevojitet
Leja unike është dokumenti që lejon një shtetas të huaj të qëndrojë dhe të punojë ligjërisht në territorin e Shqipërisë. Ajo rregullohet nga Ligji nr. 79/2021 “Për të huajt” dhe aktet nënligjore në zbatim të tij.
Neni 17, pika 17 i Ligjit nr. 79/2021: “Leje unike është leja e lëshuar nga autoritetet e Republikës së Shqipërisë, që lejon shtetasin e huaj të qëndrojë ligjërisht në territorin e Republikës së Shqipërisë për qëllime pune.”
Ekzistojnë dy llojet kryesore të lejes unike për qëllime ekonomike.
Leja Unike si Punëmarrës
Lëshimi i saj kërkon miratimin paraprak të Agjencisë Kombëtare të Punësimit dhe Aftësive (AKPA), e cila vlerëson nëse ekziston nevoja për punësimin e një shtetasi të huaj për atë pozicion.
Dokumentacioni i nevojshëm: fotokopje e pasaportës me vlefshmëri të paktën 3 muaj pas datës së skadimit të lejes; mandat pagese; fotografi e fundit 47×36 mm me sfond të bardhë; kontratë pune sipas Kodit të Punës; dëshmi akomodimi (kontratë qiraje e noterizuar ose kontratë qëndrimi në hotel); dëshmi aftësimi profesional (diplomë, certifikatë, CV ose referencë); ekstrakt bankar 12-mujor; dokumente për statusin juridik të subjektit pritës dhe vërtetim bankar për lëvizje fondesh në 12 muajt e fundit.
Leja Unike si i Vetëpunësuar (Pronar ose Person Fizik)
Kjo kategori zbatohet kur shtetasi i huaj hap aktivitetin e tij si person fizik, ose kur është ortak dhe administrator i një shoqërie tregtare.
Dokumentacioni i nevojshëm: fotokopje e pasaportës me vlefshmëri të paktën 3 muaj pas datës së skadimit të lejes; mandat pagese; fotografi e fundit 47×36 mm me sfond të bardhë; dëshmi akomodimi (kontratë qiraje e noterizuar ose kontratë qëndrimi në hotel); dëshmi aftësimi profesional (diplomë, certifikatë, CV ose referencë); ekstrakt bankar 12-mujor; vërtetim i gjendjes bankare me minimumi 5,000 Euro sipas praktikës aktuale; projekt-ide biznesi sipas udhëzimeve të AKPA-së kur kërkohet; dëshmi regjistrimi biznesi në QKB dhe dëshmi për mjete financiare të mjaftueshme sipas kuadrit ligjor.
Procedura dhe Afatet
Aplikimi kalon nëpër dy faza verifikimi, pranë Zyrës së Punës (AKPA) dhe pranë Drejtorisë së Migracionit. Ligji parashikon afatin nga 4 deri në 12 javë nga dita e aplikimit.
Aplikimi fillestar duhet të kryhet ndërkohë që individi ndodhet jashtë territorit të Shqipërisë. Rinovimi kryhet 60 ditë para skadimit të lejes ekzistuese dhe gjatë këtij procesi individi duhet të ndodhet brenda Shqipërisë.
Vlefshmëria e lejes unike është 1 vit, e ripërtëritshme. Pas 5 vitesh qëndrimi të ligjshëm dhe të pandërprerë, shtetasi i huaj mund të aplikojë për leje qëndrimi afatgjatë të tipit C, pa afat të caktuar.
Kostoja e shërbimit të AlProfit Consult për të dyja llojet e lejes unike, si për aplikimin fillestar ashtu edhe për rinovimin, është 500 Euro.
Vizat dhe Hyrja në Shqipëri
Jo të gjithë shtetasit e huaj kanë nevojë për vizë. Shqipëria ka marrëveshje pa viza me të gjitha shtetet anëtare të Bashkimit Europian, Shtetet e Bashkuara të Amerikës, Mbretërinë e Bashkuar, Japoninë, Kanadanë dhe shumë të tjera.
Shtetasit e vendeve të tjera duhet të aplikojnë para se të hyjnë në Shqipëri. Lista e plotë dhe kostot janë të publikuara nga Ministria e Punëve të Jashtme. Aplikimi bëhet pranë ambasadave ose zyrave konsullore shqiptare, ose online nëpërmjet e-albania.al. Statusi i vizës mund të kontrollohet në e-visa.al.
Ekzistojnë tre lloje kryesore vizash. Viza A është viza e tranzitit ajror. Viza C lejon qëndrim deri në 90 ditë brenda 180 ditëve dhe përdoret për turizëm, vizita biznesi ose trajnime, me vlefshmëri deri në 5 vjet. Viza D është viza e qëndrimit afatgjatë mbi 90 ditë dhe është hapi i parë kur planifikoni të punoni ose të vendoseni. Pas hyrjes me vizë D, aplikoni për lejen e qëndrimit ose lejen unike.
Procedura Hap pas Hapi
Hapi 1: Hyrja në Shqipëri
Shtetasi i huaj hyn me vizë D kur kërkohet, ose pa vizë sipas marrëveshjeve ndërkombëtare. Nëse qëllimi është punësimi, ftesa ose kontrata e punës duhet të jetë e gatshme para hyrjes.
Hapi 2: Sigurimi i Kontratës së Akomodimit
Para çdo aplikimi, dokumenti i parë dhe më i rëndësishëm është dëshmia e akomodimit. Ky dokument vërteton se individi ka adresë të rregullt dhe të ligjshme në territorin shqiptar.
Pranohet ose një kontratë qiraje e noterizuar ose një kontratë qëndrimi në hotel. Kontrata e qirasë pa noterizim nuk pranohet si dëshmi e ligjshme e vendbanimit. Ky dokument është i domosdoshëm si për lejen unike ashtu edhe për hapjen e llogarisë bankare dhe regjistrimin në gjendjen civile. Rekomandojmë ta noterizoni sa më parë, sepse kushdo që fillon procesin pa të do të hasë ngecje.
Hapi 3: Aplikimi për Leje Qëndrimi ose Leje Unike
Brenda 30 ditëve nga hyrja në territor, shtetasi i huaj paraqet kërkesë pranë Drejtorisë Rajonale të Kufirit dhe Migracionit. Aplikimi kryhet online nëpërmjet platformës e-Albania ose fizikisht pranë sporteleve.
Hapi 4: Verifikimi nga AKPA
Kur aplikimi përfshin punësim, Agjencia Kombëtare e Punësimit dhe Aftësive vlerëson nëse ekziston nevoja për atë pozicion pune dhe nëse kushtet e punësimit janë në përputhje me legjislacionin shqiptar. Ky verifikim zgjat zakonisht 5 deri në 10 ditë pune.
Hapi 5: Lëshimi i Lejes dhe Regjistrimi në Gjendjen Civile
Pasi dokumentacioni miratohet, leja unike lëshohet si kartë fizike me afat 1-vjeçar. Brenda 10 ditëve nga marrja e lejes, individi regjistrohet si banor i përkohshëm pranë Zyrës së Gjendjes Civile të njësisë vendore ku ka vendqëndrimin. Ky regjistrim i jep individit adresë zyrtare dhe është kusht për shumë veprime të mëtejshme administrative.
Hapi 6: Rinovimi
Aplikimi kryhet 60 ditë para skadimit të lejes, ndërkohë që individi ndodhet brenda Shqipërisë. Dokumentacioni ndryshon sipas kategorisë dhe pasqyron veprimtarinë e vitit të shkuar. Biznesi nuk duhet të ketë detyrime të papaguara pranë autoriteteve tatimore.
Kuadri Fiskal dhe Tatimor
Shqipëria ka një sistem tatimor relativisht të thjeshtë me norma të ulëta. Për shumë investitorë të huaj, kjo është një surprizë e këndshme.
Tatimi mbi Fitimin
Norma standarde e tatimit mbi fitimin për shoqëritë tregtare është 15%.
Por Ligji nr. 29/2023 ka vendosur normën 0% të tatimit mbi fitimin për të gjitha bizneset me qarkullim bruto vjetor nën 14 milionë lekë (rreth 140,000 Euro), pavarësisht formës ligjore, deri më 31 dhjetor 2029. Vendimi i Gjykatës Kushtetuese nr. 52/2024 ka zgjeruar këtë përfitim edhe tek profesionistët e lirë.
Tatimi mbi Vlerën e Shtuar (TVSH)
Detyrimi për regjistrim në TVSH lind kur xhiroja vjetore kalon pragun e parashikuar nga ligji. Norma standarde e TVSH-së është 20%, me norma të reduktuara për sektorë të caktuar si turizmi dhe produktet ushqimore.
Sigurimet Shoqërore dhe Shëndetësore
Çdo punëmarrës dhe punëdhënës ka detyrim ligjor të paguajë kontributet shoqërore dhe shëndetësore. Normat llogariten mbi pagën bruto dhe ndahen ndërmjet punëmarrësit dhe punëdhënësit. Shtetasit e huaj me leje unike trajtohen si punëmarrës vendas sa i përket këtij detyrimi.
Numri Unik i Identifikimit Tatimor (NIPT)
Çdo person juridik dhe çdo person fizik që ushtron aktivitet ekonomik merr NIPT-in automatikisht gjatë regjistrimit pranë QKB-së. Ky numër përdoret në çdo marrëdhënie me autoritetin tatimor dhe në çdo dokument fiskal.
Fiskalizimi
Fiskalizimi është sistemi elektronik i raportimit të transaksioneve në kohë reale pranë Drejtorisë së Përgjithshme të Tatimeve. Çdo biznes i obliguar lëshon fatura elektronike të fiskalizuara. Obligimi varet nga forma ligjore dhe natyra e veprimtarisë.
Pse Shqipëria
Shqipëria ofron sot një mjedis gjithnjë e më tërheqës për investitorët e huaj.
Fuqia punëtore — Profesionistë të rinj e të arsimuar, me njohuri të mira gjuhësore në anglisht, italisht dhe greqisht, me kosto relativisht të ulëta krahasuar me Europën Perëndimore.
Norma tatimore e ulët — Tatimi mbi fitimin 15% ose 0% deri në 2029 për bizneset e vogla krijon hapësirë reale për margjina të shëndetshme biznesi.
Infrastruktura — Aeroporti i Tiranës lidh vendin me destinacionet kryesore europiane. Aeroporte të reja rajonale dhe projekte infrastrukture vazhdojnë.
Turizmi — Shqipëria tërheq gjithnjë e më shumë vizitorë, çka krijon mundësi të mëdha në hoteleri, restorante, aktivitete rekreative dhe zhvillim pasurie të paluajtshme bregdetare e malore.
Shërbimet mjekësore dhe dentare — Klinika private ofrojnë cilësi të mirë me çmime ndjeshëm më të ulëta se Europa Perëndimore. Turizmi shëndetësor është në rritje.
Qendrat e thirrjeve dhe shërbimet e jashtëtarizuara — Kompani italiane, greke dhe britanike vendosin operacione mbështetëse në Tiranë dhe qytete të tjera.
Pasuria e paluajtshme — Interes i shtuar nga blerës të huaj, sidomos në Rivierën Shqiptare, Tiranë dhe Sarandë.
AlProfit Consult: Ekonomisti i Jashtëm i Biznesit Tuaj
Shumë investitorë të huaj arrijnë në Shqipëri me ide të qarta, por hasin të njëjtën pengesë: sistemi është i panjohur, institucionet janë të shumta dhe çdo gabim ka kosto.
AlProfit Consult eliminon këtë pengesë. Kemi ndërtuar një model shërbimi që mbulon të gjithë ciklin e jetës së biznesit, nga themelimi deri në mbylljen e mundshme të aktivitetit. Klienti komunikon me ne. Ne komunikojmë me të gjithë të tjerët.
Regjistrimi i biznesit — Kujdesemi për tërë procesin e themelimit, duke filluar nga hartimi i statutit, regjistrimi në QKB dhe marrja e NIPT-it. Koordinojmë procedurën e prokurës kur administratori nuk ndodhet fizikisht.
Administrimi financiar dhe kontabël — Mbajmë kontabilitetin sipas standardeve shqiptare, përgatisim pasqyrat financiare dhe sigurojmë pajtueshmërinë tatimore. Shërbejmë si ekonomistë të jashtëm për bizneset që nuk kanë nevojë për departament të brendshëm financiar.
Shërbimet tatimore — Menaxhojmë deklaratat tatimore, llogaritjen e detyrimeve dhe komunikimin me Drejtorinë e Tatimeve. Ju mbajmë të informuar për çdo ndryshim ligjor që ndikon biznesin tuaj.
Lejet unike — Ndjekim të gjithë procesin e aplikimit, nga mbledhja e dokumentacionit deri në depozitimin dhe ndjekjen me institucionet. Koordinojmë gjithashtu me bankën për hapjen e llogarisë.
Hapja e llogarisë bankare — Komunikojmë drejtpërdrejt me bankën, depozitojmë dokumentet dhe ju njoftojmë kur gjithçka është gati për nënshkrim.
Regjistrimi në shërbime publike — Sigurimet shoqërore, TVSH-ja, fiskalizimi dhe çdo regjistrim tjetër administrativ.
Adresa e zyrës — Zyra jonë mund të shërbejë si adresë e regjistruar e shoqërisë suaj deri në vendosjen e aktivitetit fizik.
Likuidimi dhe çregjistrimi — Kur biznesi mbyll aktivitetin, menaxhojmë procedurën ligjore të mbylljes sipas të gjitha kërkesave ligjore.
Kemi ndërtuar një cikël të mbyllur shërbimesh sepse biznesi juaj i ka nevojë të gjitha këto njëkohësisht. Leja unike, hapja e llogarisë bankare, regjistrimi tatimor: të tria ndodhin pothuajse njëkohësisht dhe kërkojnë koordinim. Ne e sigurojmë këtë koordinim.
Pyetjet më të Shpeshta
A mund të jem pronar i 100% të aksioneve si shtetas i huaj?
Po. Ligji shqiptar nuk kufizon pronësinë e huaj. Ju mund të jeni aksionar i vetëm dhe administrator i vetëm.
A mund të hap biznes pa ardhur fizikisht?
Kryesisht po, nëpërmjet prokurës së posaçme. Hapja e llogarisë bankare kërkon prezencën fizike për nënshkrim.
Kur duhet të aplikoj për leje unike?
Aplikimi bëhet ndërkohë që ndodheni jashtë Shqipërisë, pasi biznesi është i hapur dhe statusi juaj si pronar ose punëmarrës është i vendosur. Mos prisni të gjeni punë e pastaj të aplikoni.
A mund të punësohem pa leje unike?
Jo. Gjobat për punësim të paligjshëm të shtetasve të huaj janë ndërmjet 350,000 dhe 400,000 lekë.
Cili është dallimi tatimor ndërmjet person fizik dhe Sh.p.k.?
Dallimi i vetëm tatimor është tatimi mbi dividendin prej 8%, që aplikohet vetëm kur Sh.p.k. shpërndan fitimet tek ortakët. Të gjitha taksat e tjera janë identike.
A bëhem rezident fiskal shqiptar nëse hap biznes këtu?
Rezidenca fiskale varet nga numri i ditëve të qëndrimit, jo nga regjistrimi i biznesit. Mbi 183 ditë qëndrim në vit bëheni rezident fiskal shqiptar. Ky aspekt kërkon planifikim të kujdesshëm.
A ka kufizime për transferimin e kapitalit jashtë vendit?
Kapitali i investuar dhe fitimet mund të transferohen lirisht, sipas legjislacionit të investimeve të huaja.
Leggi anche:Tatimi mbi fitimin 0% në Shqipëri: Kush përfiton dhe si? & Tatimi mbi dividentin: Si funksionon shpërndarja e fitimeve? & Regjistrimi i biznesit në Shqipëri: Hapat dhe kostot.