Tatimi mbi të ardhurat nga tjetërsimi i titujve dhe mjeteve virtuale përcaktohet si diferencë midis çmimit të shitjes dhe çmimit të blerjes së këtyre aseteve. Shpenzimet e lidhura drejtpërdrejt me blerjen dhe shitjen e titujve apo instrumenteve financiare nuk zbriten nga baza tatimore.
Çmimet e blerjes dhe të shitjes përcaktohen nga dokumentet bankare dhe konfirmimet e tregtimit nga shoqëritë komisionere.
Humbjet nga tjetërsimi i titujve apo mjeteve virtuale mund të kompensohen me fitimet nga tjetërsimi i titujve apo mjeteve të tjera virtuale në të njëjtin vit tatimor.
Të ardhurat nga nxjerrja (mining) e mjeteve virtuale deklarohen në deklaratën vjetore të të ardhurave personale dhe vlerësohen me çmimin e tregut në ditën e përfitimit të mjetit virtual.