Ndryshimet në QKB nga 2 dhjetori 2026. Çfarë zbatohet dhe çfarë pret ende

Njerëz që kalojnë në një ndërtesë institucionale me xham, për ndryshimet në QKB
Pikat kryesore
  • Ndryshimet në QKB hyjnë në fuqi më 2 dhjetor 2026 dhe gjithë regjistrimi kalon vetëm në e-Albania.
  • SHPK-ja regjistrohet pa vërtetim të shlyerjes së kapitalit.
  • Aplikimi i pezulluar ka 21 ditë për ndreqje, dhe ankimi kundër QKB-së ka 15 ditë në vend të 5.
  • Certifikata e regjistrimit lëshohet elektronikisht për çdo vend ku ushtroni veprimtari dhe afishohet në secilin.
  • Certifikata e Kodit NVE dhe gjoba 60,000 lekë nuk nisin më 2 dhjetor, sepse ligji i shtyn.
Verifikuar më 19 nëntor 2026. U lexuan ligji nr. 117/2026 për QKB-në dhe ligji nr. 118/2026 për regjistrimin e biznesit, botuar te Fletorja Zyrtare nr. 250, datë 17 nëntor 2026

Ndryshimet në QKB hyjnë në fuqi më 2 dhjetor 2026. Kuvendi miratoi më 29 tetor dy ligje, njërin për Qendrën Kombëtare të Biznesit dhe tjetrin për regjistrimin e biznesit. Të dy u botuan më 17 nëntor.

Shumica e lajmeve u përqendruan te certifikata e Kodit NVE dhe te gjoba 60,000 lekë. Por pikërisht kjo pjesë nuk zbatohet më 2 dhjetor. Ajo që ndryshon vërtet është më e vogël dhe më praktike, dhe prek këdo që hap ose ndryshon një biznes.

Lexo edhe: Si të hapni biznes në Shqipëri, regjistrimi dhe NIPT

Çfarë ndryshon në QKB nga 2 dhjetori

Ku aplikohet tani?

Vetëm në e-Albania. Sportelet e QKB-së shfuqizohen dhe të gjitha procedurat bëhen nga portali. Dokumentet shoqëruese ngarkohen gjatë aplikimit, në shqip ose të përkthyera.

Për sipërmarrësin kjo do të thotë që aplikimi, njoftimet dhe vendimet e QKB-së vijnë të gjitha në llogarinë e e-Albania. Ia vlen ta kontrolloni rregullisht gjatë një procedure.

A duhet kapitali për të hapur SHPK?

Jo. Vërtetimi i shlyerjes së kapitalit nuk është më kusht për regjistrimin fillestar të SHPK-së. Bën përjashtim vetëm rasti kur një ligj i posaçëm e kërkon.

Kur kapitali duhet paguar para regjistrimit, QKB pranon pagesën elektronike. Ajo mund të bëhet në një bankë në Shqipëri ose në një shtet të Bashkimit Evropian.

Çfarë ndodh kur aplikimi pezullohet?

QKB ju njofton në e-Albania shkakun e saktë dhe ju jep 21 ditë kalendarike për ta ndrequr. Pasi e ndreqni, QKB ka 1 ditë për të kryer regjistrimin. Regjistrimi mban datën e aplikimit të parë, jo të ndreqjes.

Nëse nuk ndreqni brenda afatit, aplikimi refuzohet me njoftim elektronik. Riaplikimi pas refuzimit trajtohet si aplikim i ri.

Sa kohë keni për ankim?

15 ditë, në vend të 5 ditëve që vlenin deri tani. Ankimi i drejtohet titullarit të QKB-së dhe mund të paraqitet edhe nga e-Albania.

Certifikata për çdo vend ushtrimi të veprimtarisë

Certifikata e regjistrimit lëshohet në format elektronik për çdo vend ku ushtroni veprimtari. Biznesi detyrohet ta afishojë certifikatën përkatëse në secilin vend.

Kjo prek sidomos bizneset me më shumë se një pikë. Një dyqan me dy pika shitjeje, ose një restorant me magazinë të regjistruar më vete, duhet të ketë certifikatën e duhur të afishuar në secilën adresë.

Çfarë nuk zbatohet ende

Ligji nr. 118/2026 ka një nen që shumë e kanë kaluar pa e vënë re. Neni 78/1 shtyn një grup të tërë dispozitash derisa të plotësohen kushtet teknike të sistemit. Pjesa që i takon Dhomës Ekonomike Kombëtare pret edhe ligjin për vetë Dhomën, i cili ende nuk është miratuar.

RregulliKur zbatohet
Certifikata e Kodit NVE brenda 30 ditëve pas regjistrimitPas gatishmërisë teknike dhe ligjit për Dhomën Ekonomike
Konfirmimi vjetor i Kodit NVE, gjoba 60,000 lekë dhe bllokimiPas gatishmërisë teknike dhe ligjit për Dhomën Ekonomike
Adresa me koordinata GPSPas gatishmërisë teknike dhe vendimit të Këshillit të Ministrave
Pasqyrat financiare në QKB deri më 30 prill dhe 30 qershorPas gatishmërisë teknike. Deri atëherë vlen afati i 31 korrikut
Modelet standarde të statutit dhe identifikimi elektronik i shtetasve të BE-sëBrenda 12 muajve nga 2 dhjetori 2026
Identifikuesi unik evropian dhe lidhja me regjistrat e BE-sëNë datën e anëtarësimit në Bashkimin Evropian

Pra më 2 dhjetor asnjë biznes nuk ka detyrim për certifikatën NVE dhe askush nuk gjobitet për të. Si do të funksionojë ajo kur të nisë, e kemi shpjeguar te Dhoma Ekonomike Kombëtare dhe certifikata e kodit NVE.

Ndryshimet në QKB sjellin edhe regjistrimin e degëve të shoqërive të BE-së dhe të shndërrimeve ndërkufitare. Këto lidhen me ligjin e ri që lejon transferimin e selisë në Shqipëri pa mbyllur shoqërinë.

Kur të nisë certifikata NVE ose të dalin vendimet zbatuese, ju njoftojmë direkt në email me shpjegim praktik.

Dërgomë njoftimet falas

Pyetje të shpeshta

A duhet të bëj diçka për biznesin tim ekzistues më 2 dhjetor?

Jo, për NVE-në nuk keni asnjë veprim për të bërë tani. Ndryshimet që zbatohen menjëherë prekin kryesisht aplikimet e reja dhe ndryshimet që bëni në QKB.

A mund të shkoj ende te sporteli i QKB-së?

Jo. Nga 2 dhjetori QKB i ushtron funksionet vetëm nëpërmjet portalit e-Albania.

A më duhet llogari bankare për të hapur SHPK?

Jo për vërtetimin e kapitalit, sepse ai nuk kërkohet më për regjistrimin. Llogarinë bankare do t’ju duhet gjithsesi për punën e përditshme të shoqërisë.

Kur fillon gjoba 60,000 lekë për Kodin NVE?

Vetëm kur të plotësohen kushtet teknike dhe të hyjë në fuqi ligji për Dhomën Ekonomike Kombëtare. Data nuk dihet ende.

Kur ndryshon afati i pasqyrave financiare?

Jo tani. Afatet e reja në QKB, 30 prill dhe 30 qershor, janë të shtyra. Për pasqyrat e vitit 2026 vlen ende 31 korriku 2027.

Çfarë ndodh nëse aplikimi im refuzohet?

QKB ju jep shkakun me shkrim në e-Albania. Mund të aplikoni sërish, por aplikimi i ri trajtohet si i ri dhe nuk ruan datën e të parit.

Baza ligjore

Ligji nr. 117/2026 “Për disa ndryshime dhe shtesa në ligjin nr. 131/2015, ‘Për Qendrën Kombëtare të Biznesit'” dhe ligji nr. 118/2026 “Për disa ndryshime dhe shtesa në ligjin nr. 9723, datë 3.5.2007, ‘Për regjistrimin e biznesit'”, miratuar më 29.10.2026, botuar te Fletorja Zyrtare nr. 250, datë 17.11.2026, në fuqi më 2.12.2026. Kapitali, neni 41. Pezullimi dhe refuzimi i aplikimit, nenet 56 dhe 57. Certifikata e regjistrimit, neni 62. Ankimi, neni 72. Dispozitat e shtyra, neni 78/1. Aktet nënligjore, neni 76, pika 6.

Ne i bëjmë regjistrimet dhe ndryshimet në QKB për klientët tanë nga e-Albania, me afatet e reja nën kontroll. Nëse po hapni një biznes ose po ndryshoni të dhënat e tij, e ndjekim bashkë nga aplikimi te certifikata.

SHIKONI PAKETAT TONA

Rreth autorit

Andi Haxhillari është ekonomist dhe themelues i AlProfit Consult, zyrë kontabiliteti, këshillimi tatimor dhe menaxhimi financiar në Tiranë, e themeluar në 2015. Mban titullin profesional Kontabilist i Miratuar, çertifikata nr. 359, lëshuar nga Autoriteti i Çertifikimit pranë Ministrisë së Financave më 4 korrik 2012. Është diplomuar Master i Nivelit të Dytë në Kontabilitet dhe Ekonomist i Përgjithshëm në Fakultetin e Ekonomisë të Universitetit të Tiranës. Prej më shumë se dhjetë vitesh punon si ekonomist i jashtëm për biznese të vogla dhe të mesme në Shqipëri.

GDPR