- Regjistri Qendror i Llogarive Bankare është ngritur me ligjin nr. 154/2020.
- Raportuese janë institucionet financiare, banka dhe jobanka, që administrojnë llogari bankare dhe kaseta sigurie.
- Zbatimi i detyrimit të raportimit nisi nga janari 2021.
- Institucionet që nuk raportojnë i nënshtrohen penaliteteve sipas atij ligji.
- Për shoqërinë dhe për personin fizik në TVSH kjo do të thotë se llogaria e biznesit duhet të jetë e deklaruar te tatimet brenda 20 ditëve nga regjistrimi.
Regjistri Qendror i Llogarive Bankare u krijua me ligjin nr. 154/2020, si pjesë e përafrimit me legjislacionin e Bashkimit Evropian. Ai mbledh në një vend të dhënat që institucionet financiare raportojnë për llogaritë bankare dhe kasetat e sigurisë.
Detyrimi i raportimit u takon institucioneve financiare, jo bizneseve. Megjithatë pasoja praktike për biznesin është e drejtpërdrejtë dhe shpesh nuk kuptohet.
Çfarë ndryshon për një biznes
Deri para regjistrit, lidhja mes një llogarie bankare dhe një subjekti tatimor varej nga deklarimi i vetë subjektit. Sot ajo lidhje ekziston në mënyrë të pavarur.
Prandaj rregulli që duhet mbajtur mend nuk është i ri, por bëhet më i rëndësishëm. Shoqëritë, personat fizikë në TVSH dhe organizatat jofitimprurëse e hapin llogarinë bankare të biznesit dhe e deklarojnë te organet tatimore brenda 20 ditëve kalendarike nga regjistrimi, sipas nenit 59 të ligjit nr. 9920/2008. Hapat janë te faqja jonë e deklarimit në e-Filing.
Po ashtu, përzierja e llogarisë personale me atë të biznesit bëhet më e dukshme dhe më e kushtueshme. Pse kjo është problem edhe kontabël e shpjegon artikulli ynë për gabimet pas regjistrimit të biznesit.
Çfarë duhet kontrolluar sot
- Nëse të gjitha llogaritë e biznesit janë të deklaruara te tatimet, përfshirë ato të hapura më vonë.
- Nëse llogaria e deklaruar përputhet me atë që përdoret realisht për arkëtime dhe pagesa.
- Nëse pagesat e biznesit kalojnë nga llogaria e biznesit dhe jo nga ajo personale.
Çdo herë që ka një ndryshim tatimor ose financiar që prek biznesin tuaj, ju njoftojmë direkt në email me shpjegim praktik.
Dërgomë njoftimet falasPyetje të shpeshta
A duhet të raportoj unë si biznes te ky regjistër?
Jo. Subjekte raportuese janë institucionet financiare. Detyrimi juaj është deklarimi i llogarisë te organet tatimore.
Brenda sa ditëve deklarohet llogaria e biznesit?
Brenda 20 ditëve kalendarike nga regjistrimi, sipas nenit 59 të ligjit nr. 9920/2008.
Po llogaritë e hapura më vonë?
Deklarohen po ashtu. Detyrimi nuk mbaron me llogarinë e parë.
Njoftimi origjinal i Drejtorisë së Përgjithshme të Tatimeve
Drejtoria e Përgjithshme e Tatimeve ka filluar zbatimin e detyrimit ligjor të raportimit të llogarive bankare, bazuar në ligjin Nr. 154/2020 “Për Regjistrin Qendror të Llogarive Bankare”, në kuadër të përafrimit të legjislacionit tonë me atë të Bashkimit Europian.
Sipas këtij përcaktimi është ngritur edhe regjistri mbartës i të dhënave të këtij detyrimi ligjor. Subjekt raportues i të dhënave janë të gjitha institucionet financiare banka dhe jo banka, të cilat kanë në administrimin e tyre llogari bankare dhe kaseta sigurie.
Administrata Tatimore që prej Janarit 2021 ka inkurajuar të përmbushin detyrimet që lindin nga ky ligj, të gjitha institucionet financiare të lartpërmendura.
Institucionet financiare, të cilat ende nuk kanë raportuar pranë Drejtorisë së Përgjithshme të Tatimeve, duke mos përmbushur detyrimet e tyre ligjore, do të jenë subjekt për penalitete të mëtejshme, sipas dispozitave që parashikon ky ligj.
Burimi: Drejtoria e Përgjithshme e Tatimeve.