AlProfit Consult po kërkon një Senior Accountant në Tiranë. Më poshtë gjeni përshkrimin e plotë të rolit, kërkesat dhe mënyrën se si të aplikoni.
Një ftesë për ata që duan të ndërtojnë, jo thjesht të punojnë
Në AlProfit Consult ne besojmë se kontabiliteti nuk është një profesion teknik i ftohtë, por një profesion me ndikim real në jetën e njerëzve dhe në vendimet që marrin bizneset çdo ditë. Ne nuk ekzistojmë vetëm për të përgatitur pasqyra financiare apo për të përmbushur detyrime ligjore. Ne ekzistojmë për të ndihmuar bizneset të kursejnë kohë dhe para, duke u dhënë qartësi, strukturë dhe besim.
Puna jonë ka kuptim sepse ndikon direkt në jetën e përditshme të klientëve tanë. Dhe pikërisht për këtë arsye, njerëzit që punojnë me ne kanë rëndësi më shumë se çdo proces apo program.
Lexo edhe: Cila është forma e bashkëpunimit me AlProfit?
Rreth rolit
Pozicioni i Senior Accountant në AlProfit nuk është një rol i izoluar dhe as një punë rutinë e mbyllur pas një tavoline. Është një rol aktiv, në zemër të shërbimit ndaj klientit dhe në bashkëpunim të vazhdueshëm me ekipin.
Si Senior Accountant, ju do të menaxhoni në mënyrë të pavarur një portofol klientësh, nga çështjet e përditshme kontabël dhe tatimore te përgatitja e pasqyrave financiare dhe raporteve periodike, duke qenë pika kryesore e kontaktit për ta. Por mbi të gjitha, do të kuptoni biznesin përtej dokumenteve dhe shifrave dhe do të shihni se si puna juaj ndikon drejtpërdrejt në vendimmarrjen e tyre.
Ky është një rol për dikë me eksperiencë pune në kontabilitet, që kërkon pavarësi, gjykim profesional dhe përgjegjësi më të madhe në punën e përditshme. Aftësitë teknike janë të domosdoshme, por qëndrimi, përgjegjësia dhe mënyra e të menduarit janë ato që e bëjnë vërtet ndryshimin në një rol të tillë.
Përgjegjësitë kryesore të rolit
- Menaxhimi i pavarur i një portofoli klientësh, duke mbuluar të gjithë ciklin kontabël dhe tatimor.
- Rishikimi dhe verifikimi i regjistrimeve kontabël, faturave dhe deklarimeve, duke garantuar saktësinë para dorëzimit.
- Përgatitja dhe analiza e pasqyrave financiare dhe raporteve periodike për klientët.
- Trajtimi i çështjeve më komplekse kontabël dhe tatimore, si dhe këshillimi i klientëve për detyrimet dhe afatet e tyre.
- Zbatimi i axhendës së punës dhe ndjekja e çështjeve në vazhdim.
- Organizimi dhe drejtimi i takimeve periodike me klientët, zakonisht çdo tre ose gjashtë muaj.
- Mbështetja dhe orientimi i kolegëve më të rinj në ekip, duke ndarë njohuri dhe përvojë.
- Zbatimi dhe përmirësimi i procedurave të brendshme, si dhe dokumentimi korrekt i punës së kryer.
Kë kërkojmë?
Ne nuk kërkojmë njerëz që dinë gjithçka. Kërkojmë njerëz që duan të bëhen më të mirë.
Kërkojmë kandidatë me eksperiencë pune në kontabilitet, që kanë përfunduar studime në Financë dhe Kontabilitet ose në fusha të tjera të lidhura ngushtë me biznesin dhe menaxhimin. Përtej titullit të diplomës, për ne ka rëndësi mënyra si mendoni, si komunikoni dhe si i qaseni punës.
Ajo që ne vlerësojmë realisht është aftësia për të punuar në grup, dëshira për të mësuar vazhdimisht, përgjegjësia për punën e marrë përsipër dhe thjeshtësia në komunikim. Ne besojmë se puna e mirë bëhet kur njerëzit ndihmojnë njëri-tjetrin, planifikojnë përpara dhe nuk fshihen pas justifikimeve.
Njohja e gjuhës angleze dhe/ose italiane përbën një avantazh shumë të madh, jo vetëm për komunikimin me klientë, por edhe për zhvillimin profesional afatgjatë brenda kompanisë.
Si është të punosh në AlProfit
Në AlProfit puna bëhet në ekip dhe me plan. Ne nuk besojmë në improvizim të vazhdueshëm dhe as në zgjidhje momentale që krijojnë probleme më vonë. Preferojmë më pak punë, por të menduara dhe të kryera siç duhet.
Do të gjeni një ambient ku komunikimi është i hapur, ku pyetjet nuk paragjykohen dhe ku gabimet trajtohen si mundësi për të mësuar, jo si arsye për të fajësuar. Secili ka përgjegjësitë e veta, por askush nuk lihet vetëm përballë tyre.
Objektivi ynë është të ndërtojmë një ekip të qëndrueshëm, ku njerëzit rriten profesionalisht dhe personalisht, dhe ku puna e përditshme ka kuptim dhe drejtim. Mund të njiheni më shumë me ne te faqja Rreth nesh ose duke ndjekur ekipin tonë në LinkedIn.
Pse kjo ftesë
Ne po kërkojmë më të mirët, jo në kuptimin e njerëzve perfektë, por në kuptimin e njerëzve të duhur, në vendin e duhur. Njerëz që duan të kontribuojnë, të mësojnë dhe të ndërtojnë diçka afatgjatë.
Nëse po kërkoni thjesht një vend pune, ndoshta ka shumë alternativa të tjera. Nëse po kërkoni një ambient ku mund të rriteni, të sfidoheni dhe të bëheni pjesë e një ideje më të madhe, atëherë kjo ftesë është për ju.
Si të aplikoni me sukses
Aplikimi është i thjeshtë. Na dërgoni CV-në tuaj në [email protected] deri më 15 Korrik 2026. Nuk ju duhet një letër motivimi e gjatë. Mjafton një paragraf i shkurtër ku na tregoni pse ju intereson ky rol dhe çfarë kërkoni në hapin tjetër të karrierës suaj.
Një këshillë e vogël që na ndihmon shumë. Te CV-ja, mos na tregoni vetëm ku keni punuar, por çfarë keni bërë konkretisht. Përshkruani llojin e klientëve që keni menaxhuar, programet kontabël që keni përdorur dhe përgjegjësitë që keni mbajtur vetë. Kjo na jep një pamje shumë më të qartë se sa një listë titujsh pune.
Pyetje të shpeshta
A duhet patjetër të kem eksperiencë për këtë pozicion?
Po. Ky është një rol Senior, ndaj kërkon eksperiencë pune në kontabilitet dhe aftësi për të punuar në mënyrë të pavarur. Nëse jeni në fillim të karrierës, ju ftojmë të ndiqni faqen tonë, sepse hapim periodikisht edhe pozicione të tjera.
Çfarë lloj klientësh do të menaxhoj?
Do të menaxhoni një portofol klientësh që përfshin biznese të vogla dhe të mesme shqiptare, si dhe investitorë të huaj. Çdo klient ka ritmin e vet të punës dhe takimet periodike, dhe ju do të jeni pika kryesore e kontaktit për ta.
A është e domosdoshme njohja e gjuhëve të huaja?
Nuk është e domosdoshme, por njohja e anglishtes dhe/ose italishtes është një avantazh i madh, sepse punojmë edhe me klientë ndërkombëtarë dhe komunikimi me ta është pjesë e përditshmërisë.
A ka mundësi për rritje brenda kompanisë?
Po. AlProfit është organizuar në mënyrë që rolet të jenë të qarta dhe njerëzit të rriten me përgjegjësi gjithnjë e më të mëdha. Roli Senior është vetë një hap rritjeje, dhe rruga nuk ndalon këtu për ata që duan të ecin më tej.
Pozicion i hapur pune – Senior Accountant (Kontabilist/e i/e lartë)
Nëse e ndjen që kjo mënyrë e të punuarit të përfaqëson dhe dëshiron të ndërtosh një rrugëtim profesional me kuptim, AlProfit Consult po kërkon një Senior Accountant (Kontabilist/e i/e lartë).
Ky rol është për ata që kanë eksperiencë në kontabilitet, duan më shumë përgjegjësi dhe pavarësi, dhe kërkojnë të bëhen pjesë e një ekipi që punon me plan, në grup dhe me përgjegjësi reale ndaj klientëve.
DËRGO APLIKIMIN TANI duke na nisur CV-në tënde deri më 15 Korrik 2026.
Ose na kontakto direkt në +355 69 323 2349 ose [email protected].