Ndryshime të personit fizik

Çdo ndryshim në të dhënat e regjistruara të personit fizik duhet të njoftohet në QKB brenda afateve ligjore. Procesi bëhet tërësisht online, falas, brenda 24 orëve, sipas nenit 43 të Ligjit Nr. 9723/2007. Procedura është e njëjtë për çdo lloj ndryshimi.

Lexo edhe: Çregjistrimi i personit fizik dhe mbyllja e NIPT-it.

Çfarë mund të ndryshosh

• Emri tregtar
• Adresa e selisë
• Aktiviteti ekonomik (kodi NVE)
• Xhiro e parashikuar vjetore
• Llojet e taksave
• Të dhënat e personit të autorizuar

Para se të fillosh

• Llogari aktive në e-Albania si biznes jo si individ
• Nënshkrim elektronik i vlefshëm
• Prokurë noteriale, vetëm nëse aplikuesi është person tjetër nga personi fizik

Kujdes: identifikimi duhet të bëhet si Biznes duke përdorur NIPT-in, jo si qytetar me numrin e identitetit. Ky është hapi bazë i aplikimit.

Hapat e procedurës

Procesi kryhet në portalin e-Albania, te shërbimi “Aplikim për ndryshim të personit fizik”.

1. Identifikohuni si biznes në e-Albania duke përdorur NIPT-in dhe fjalëkalimin.
2. Kërkoni shërbimin “Aplikim për ndryshim të personit fizik” dhe klikoni “Përdor”.
3. Plotësoni formularin elektronik me të dhënat e reja. Të dhënat ekzistuese shfaqen automatikisht nga databazat shtetërore.
4. Ngarkoni prokurën noteriale, nëse aplikuesi është person tjetër nga personi fizik.
5. Klikoni “Dërgo” në faqen e fundit të formularit.
6. Klikoni “Dërgo kodin e nënshkrimit”, vendosni kodin dhe klikoni “Nënshkruaj”.
7. Aplikimi shqyrtohet nga nëpunësi i autorizuar i QKB-së dhe merret vendimi: Miratim, Pezullim ose Refuzim.
8. Përgjigja dërgohet automatikisht me email dhe shfaqet te “Hapësira Ime” në e-Albania.

Dokumentet tuaja personale sigurohen drejtpërdrejt nga nëpunësi i administratës nëpërmjet databazave shtetërore. Nuk keni nevojë t’i dorëzoni vetë.

Koha dhe kostoja

QKB kryen ndryshimin dhe lëshon vërtetimin brenda një dite nga data e paraqitjes së aplikimit, sipas nenit 54 të Ligjit nr. 9723/2007. Për aplikimet gjatë festave zyrtare, afati fillon nga dita pasardhëse e punës. Shërbimi është pa pagesë dhe vlefshmëria është pa afat. Kujdes, e gjithë procedura e ndryshimit të dhënave për person fizik kryhet përmes QKB-së.

Për pyetje mbi shërbimin kontaktoni: [email protected]

Baza ligjore

• Ligji nr. 9723/2007 “Për Regjistrimin e Biznesit” (i ndryshuar), nenet 43 dhe 54
• Kodi Civil
• Ligji nr. 9920/2008 “Procedurat Tatimore në Republikën e Shqipërisë” (i ndryshuar)
• Ligji nr. 9880/2008 “Për nënshkrimin elektronik”
• Ligji nr. 10273/2010 “Për dokumentin elektronik”

Listën e plotë të legjislacionit gjendet te faqja e legjislacionit të QKB-së.

Pyetjet më të shpeshta për ndryshimet e personit fizik

Brenda sa ditëve duhet të regjistrohet ndryshimi?

Ligji nuk përcakton afat specifik ditor për njoftimin e ndryshimeve, por detyrimi është i menjëhershëm. Çdo vonesë e pajustifikuar mund të sjellë gjoba administrative. Prandaj ndryshimi regjistrohet sa më shpejt pas faktit.

A mund të ndryshoj aktivitetin ekonomik nëse jam regjistruar gabimisht?

Po. Ndryshimi i kodit NVE bëhet nëpërmjet të njëjtit shërbim. Kujdes: ndryshimi i aktivitetit mund të ndikojë në kategorinë tatimore.

A duhet nënshkrim elektronik edhe për ndryshimet?

Po. Nënshkrimi elektronik është i detyrueshëm edhe për aplikimet e ndryshimit, njëlloj si për regjistrimin fillestar.

A mund të ndryshoj adresën nëse jam zhvendosur në qytet tjetër?

Po. Ndryshimi i adresës së selisë bëhet nëpërmjet të njëjtit shërbim dhe regjistrohet brenda 24 orëve.

Si identifikohem në e-Albania për ndryshimet?

Duhet të identifikoheni si Biznes duke përdorur NIPT-in, jo si individ me numrin e identitetit. Kjo është diferenca kryesore nga regjistrimi fillestar.

Lexo edhe: Regjistrimi fillestar i personit fizik

Lexo edhe: Çregjistrimi i personit fizik