Transferimi i Çmimit

Çfarë është Transferimi i Çmimit?

Transferimi i çmimit i referohet përcaktimit të çmimeve për transaksionet ndërmjet palëve të lidhura, që mund të jenë shoqëri që ndajnë pronësinë apo kontrollin. Për shembull, nëse një kompani në Shqipëri blen mallra nga kompania mëmë jashtë vendit, çmimi i këtyre mallrave duhet të përputhet me çmimin që do të aplikohej në treg mes palëve të pavarura.

Parimi i Tregut (“Arm’s Length”)

Ky parim kërkon që çmimet dhe kushtet e transaksioneve të kontrolluara të jenë të ngjashme me ato që do të vendoseshin mes palëve të pavarura. Kjo shmang manipulimin e çmimeve që mund të çojë në shmangie tatimore.

Transaksionet e Kontrolluara

Transaksionet e kontrolluara janë marrëdhënie ekonomike ndërmjet palëve të lidhura dhe mund të përfshijnë:

• Shitjen e mallrave ose shërbimeve.
• Transferimin e pasurive jomateriale si marka tregtare ose patenta.
• Marrëveshjet financiare, përfshirë huadhënien ose pagesën e interesave.

Metodat për Transferimin e Çmimit

Për të vlerësuar nëse një transaksion përputhet me parimin e tregut, përdoren pesë metoda kryesore. Zgjedhja e metodës bëhet bazuar në natyrën e transaksionit dhe informacionin e disponueshëm:

1. Metoda e Çmimit të Krahasueshëm të Pakontrolluar: Krahason çmimet e transaksioneve të kontrolluara me çmimet në treg për transaksione të ngjashme.
2. Metoda e Çmimit të Rishitjes: Analizon çmimin e rishitjes së një produkti duke zbritur marzhin e fitimit.
3. Metoda “Kosto Plus”: Shtohet një marzh fitimi mbi koston e prodhimit ose shërbimit.
4. Metoda e Marzhit Neto të Transaksionit: Analizon fitimin neto të një transaksioni për një periudhë specifike.
5. Metoda e Ndarjes së Fitimit: Ndarja e fitimit bëhet bazuar në funksionet dhe risqet e ndërmarra nga secila palë.

Këto metoda ndihmojnë autoritetet tatimore dhe tatimpaguesit të sigurojnë që çmimet e transferimit janë të arsyeshme dhe përputhen me kushtet e tregut.

Marrëveshjet e Çmimit në Avancë (MÇA)

Çfarë është MÇA?

Marrëveshja e Çmimit në Avancë (MÇA) është një marrëveshje paraprake midis tatimpaguesit dhe administratës tatimore që përcakton metodën për llogaritjen e çmimeve të transferimit për transaksionet e ardhshme.

Llojet e MÇA

• Njëanshme: Kufizohet në marrëveshjen midis tatimpaguesit dhe autoriteteve tatimore shqiptare.
• Dypalëshe ose Shumëpalëshe: Përfshin edhe autoritete tatimore ndërkombëtare, duke siguruar pajtueshmëri në më shumë se një juridiksion.

Përfitimet e MÇA

• Siguri ligjore për periudhën e vlefshmërisë.
• Eliminon rrezikun e rregullimeve tatimore në të ardhmen.
• Redukton mosmarrëveshjet ndërmjet tatimpaguesve dhe administratës tatimore.

Tatimpaguesit që kërkojnë të hyjnë në një MÇA duhet të dorëzojnë një kërkesë zyrtare dhe dokumentacion mbështetës që justifikon çmimet e propozuara.

Dokumentacioni dhe Raportimi

Pse është i rëndësishëm dokumentacioni?

Dokumentacioni ndihmon tatimpaguesit të justifikojnë çmimet e transaksioneve dhe të dëshmojnë përputhshmërinë me parimin e tregut. Ai është i detyrueshëm për tatimpaguesit që kryejnë transaksione të kontrolluara mbi 50 milionë lekë në vit.

Çfarë duhet të përmbajë dokumentacioni?

• Përshkrim i detajuar i transaksioneve dhe kushteve të tyre.
• Metodat e përdorura për të përcaktuar çmimet.
• Analiza krahasuese me transaksione të ngjashme në treg.
• Justifikimi i metodës së zgjedhur.

Raportimi Vjetor

Tatimpaguesit që plotësojnë kushtet duhet të paraqesin një njoftim vjetor në administratën tatimore ku detajohen transaksionet e kontrolluara.

Kontrolli dhe Rregullimet nga Autoritetet Tatimore5.1 Si kryhet kontrolli?

Administrata tatimore ka të drejtë të kontrollojë transaksionet e raportuara për të siguruar përputhshmërinë me parimin e tregut. Në rast mospërputhjeje, ajo mund të kryejë rregullime.

Rregullimet Korresponduese

Në rast të marrëveshjeve ndërkombëtare për shmangien e tatimit të dyfishtë, zbatohen rregullime për të garantuar që tatimpaguesit të mos penalizohen në mënyrë të padrejtë.