Pikat kryesore
- Raport mjekësor për paaftësi në punë nga sëmundja paguhet vetëm për të punësuarit.
- 14 ditët e para i paguan punëdhënësi, jo më pak se 80% të pagës, sipas nenit 130 të Kodit të Punës.
- Nga dita e 15-të paguan sigurimi shoqëror, 70% të mesatares ditore neto të 6 muajve të fundit, ose 80% kur keni mbi 10 vjet sigurim.
- Pagesa zgjat deri në 6 muaj gjithsej, duke përfshirë 14 ditët e punëdhënësit.
- Dokumentet i dorëzoni te punëdhënësi, që e llogarit pagesën dhe e dërgon listëpagesën e përfitimeve në ALSSH.
Verifikuar më 18 shtator 2026. Shifrat sipas neneve 20 deri 25 të ligjit nr. 7703/1993 për sigurimet shoqërore dhe nenit 130 të Kodit të Punës. Lejet e veçanta sipas Kodit të Punës
Raporti mjekësor për paaftësi në punë nga sëmundja i jep të punësuarit të drejtën e pagesës për ditët që mungon. Më poshtë gjeni kushtet e përfitimit, dokumentet që dorëzoni dhe sa paguhet raporti mjekësor nga sigurimet.
Lexo edhe: pagesa e raportit mjekësor nga ana e punëdhënësit, sa ditë paguan biznesi, me çfarë përqindjeje dhe si llogaritet, me shembull.
Kushtet e përfitimit nga raporti mjekësor
- Pagesë për paaftësi nga sëmundjet përfitojnë vetëm të punësuarit;
- 14 ditëshi i parë paguhet nga ana e subjektit ku punon përfituesi;
- Mbi ditën e 14-të të raporteve, të cilat jepen nga Komisioni Mjekësor (KM), raportet paguhen nga sigurimet shoqërore. Por gjithmonë llogaritjet bëhen nga subjekti;
- Raporti mjekësor paguhet deri në 6 muaj gjithsej, duke përfshirë dhe pagesën prej 14 ditësh.
Rregullat e lejeve të punonjësit, përfshirë mungesën për shkak sëmundjeje, i gjeni te lejet e veçanta sipas Kodit të Punës, ndërsa kontributet që mbahen nga paga te sigurimet shoqërore.
Dokumentet që dorëzon punonjësi
- I punësuari duhet të dorëzojë pranë subjektit ku punon këto dokumenta:
- Raportet mjekësore;
- Fotokopje e kartës së identitetit;
- Librezën e punës ose vërtetimin e vjetërsisë;
- Formularin e bazës së vlerësuar të 6 muajve të fundit. (Ky dokument plotësohet nga sektori i financës së subjektit ose merret nga portali e-Albania);
- Sektori i financës së subjektit, mbështetur në dokumentet e mësipërme, plotëson formularin tip-Listëpagesë e përfitimeve afatshkurtra, dhe e dërgon atë në ALSSH-në, ku ka aktivitetin subjekti;
- ALSSH pasi kontrollon dhe verifikon dokumentet e sjella, i kalon pagesat në llogarinë personale të përfituesit.
Sa paguhet raporti mjekësor nga sigurimet
- Të ardhurat për sëmundje janë 70 për qind e mesatares ditore të bazës së vlerësuar neto të gjashtë muajve të fundit nga data e lindjes së të drejtës, kur i siguruari ka deri në 10 vjet sigurim ;
- 80 për qind kur i siguruari ka mbi 10 vjet sigurim.
Burimi: Instituti i Sigurimeve Shoqërore
Çdo herë që ka një ndryshim tatimor ose financiar që prek biznesin tuaj, ju njoftojmë direkt në email me shpjegim praktik.
Dërgomë njoftimet falas