Projektligjet e Paketës Fiskale 2027 në Kuvend. Çfarë thonë tekstet, nen për nen, me dokumentet zyrtare

Projektligjet e Paketës Fiskale 2027 janë depozituar në Kuvend dhe ne i lexuam të plota. Janë katër tekste që ndryshojnë ligjin për tatimin mbi të ardhurat, ligjin për TVSH-në, ligjin për taksat kombëtare dhe ligjin për akcizat. Secili vjen me relacionin e qeverisë dhe me raportin e Komisionit për Çështjet Ligjore.

Leximi sqaron tri pika që deri tani mbështeteshin te deklaratat. Tatimi mbi fitimin nuk preket në asnjë nen. Norma e sipërme e pagave është 30%, jo 32%. Ushqimet me 6% janë 14 kategori dhe lista e detajuar del me vendim të qeverisë brenda 15 janarit 2027.

Asnjë nga tekstet nuk është ligj. Ato mund të ndryshojnë në komisione dhe në seancë, prandaj çdo shifër më poshtë lexohet si propozim. Në fund të çdo seksioni gjeni dokumentet zyrtare për shkarkim.

Lexo edhe: Paketa Fiskale 2027, çfarë propozohet për biznesin, Taksat 2027, çfarë është vendosur dhe çfarë pret Kuvendin, Pragu i TVSH-së ulet në 5,000,000 LEK, si matet

Ku ndodhen sot projektligjet e Paketës Fiskale 2027

Këshilli i Ministrave i propozoi tekstet dhe Kuvendi i shqyrton bashkë me projektbuxhetin 2027. Komisioni për Çështjet Ligjore i shqyrtoi më 2 nëntor 2026, si komision për dhënie mendimi. Ai i miratoi në parim me shumicë votash. Komisioni përgjegjës është ai për Ekonominë, Punësimin dhe Financat. Pas tij vijnë votimi në seancë, dekreti i Presidentit dhe botimi në Fletoren Zyrtare.

Projektligji	Ligji që ndryshon	Nene	Efektet nisin
Tatimi mbi të ardhurat	nr. 29/2023	8	1 janar 2027
Tatimi mbi vlerën e shtuar	nr. 92/2014	7	1 janar 2027
Taksat kombëtare	nr. 9975/2008	7	1 janar 2027
Akcizat	nr. 61/2012	5	1 janar 2027, pjesa në përqindje e cigareve nga 1 janari 2030

Të katër tekstet hyjnë në fuqi 15 ditë pas botimit në Fletoren Zyrtare. Raportet e komisionit flasin për pesë projektligje të paketës. I pesti nuk është pjesë e këtij leximi, prandaj gjobat dhe procedurat nuk trajtohen këtu.

Tatimi mbi të ardhurat, dividendi 15% dhe fasha e re 30%

Projektligji ka 8 nene. Tabela i rendit sipas radhës dhe tregon kë prek secili.

Neni	Çfarë ndryshon	Kë prek
1	Huatë, paradhëniet dhe financimet për ortakët hyjnë te përkufizimi i dividendit, kur nuk janë transaksione reale ose shlyerje detyrimesh	Shoqëritë ku pronari tërheq para pa kontratë
2	Përjashtohen nga tatimi të ardhurat personale të personave të verbër, invalidëve paraplegjikë dhe tetraplegjikë, personave me surdomutizëm dhe invalidëve të punës	Individët dhe të vetëpunësuarit e vetëm me këtë status
3	Fasha 13% zgjerohet deri 300,000 LEK pagë bruto në muaj, fasha 23% shkon deri 700,000 LEK dhe mbi të hyn norma 30%. Të ardhurat nga investimi tatohen me 15%	Punonjësit me pagë mbi 200,000 LEK dhe çdo ortak që merr dividend
4 dhe 7	Pasqyrat financiare dorëzohen vetëm në QKB, duke nisur nga pasqyrat e vitit 2027	Çdo biznes që depoziton pasqyra në QKB
5 dhe 6	Dividendi dhe tatimi i mbajtur në burim unifikohen në 15%	Shoqëritë që shpërndajnë fitim
8	Hyrja në fuqi dhe efektet nga 1 janari 2027	Të gjithë

A rritet tatimi mbi fitimin në 17%?

Jo. Asnjë nga 8 nenet nuk e prek normën e tatimit mbi fitimin. Ajo mbetet 15% për bizneset mbi 14,000,000 LEK xhiro dhe 0% nën këtë prag deri më 31 dhjetor 2029. Rritja në 17% ishte te drafti paraprak i tetorit dhe nuk ndodhet te teksti i depozituar.

Sa është norma mbi 700,000 LEK, 30% apo 32%?

Është 30%. Teksti e shkruan si 30% mbi 8,040,000 LEK bazë tatimore vjetore, që i përgjigjet pagës bruto mbi 700,000 LEK në muaj. Relacioni jep edhe formulën mujore, 127,100 LEK plus 30% e shumës mbi 700,000 LEK.

Shifra 32% vjen nga drafti paraprak. Relacioni ka ende një pasaktësi të mbetur nga ai draft, ndërsa neni dhe tabela thonë qartë 30%. Sipas relacionit, nga fashat e reja përfitojnë rreth 25,704 punonjës dhe paguajnë më shumë rreth 1,293.

Çfarë ndodh me dividendin e fitimeve të vjetra?

Teksti nuk ka dispozitë kalimtare për dividendin. Norma 15% i fillon efektet më 1 janar 2027, pa dallim nga viti që i përket fitimi. Sipas ligjit në fuqi, detyrimi lind me vendimin për shpërndarjen e fitimit. Prandaj një shpërndarje e vendosur dhe e paguar brenda dhjetorit 2026 mbetet nën normën 8%.

Çfarë nuk ndodhet te teksti?

Ndryshimi i sponsorizimeve, që përmendej te drafti paraprak, nuk ndodhet në asnjë nen. Relacioni dhe raporti i komisionit e përmendin ende te efektet për buxhetin, por pa një dispozitë përkatëse. Nuk ka as ndryshim për personin fizik tregtar dhe as për kontributet e sigurimeve.

TVSH-ja, norma 21%, akomodimi 10% dhe ushqimet me 6%

Projektligji ka 7 nene. Dy prej tyre ndryshojnë normat. Të tjerat lidhen me skemën e fermerëve, me bursën e energjisë dhe me afatin e listës së ushqimeve.

Neni	Çfarë ndryshon
1	Norma standarde kalon nga 20% në 21%
2	Akomodimi kalon nga 6% në 10%. Shtohet norma 6% për 14 kategori ushqimesh
3	Hiqet përmendja e normës 20% te skema e kompensimit të prodhuesve bujqësorë
4 dhe 5	Regjimi i veçantë për Bursën Shqiptare të Energjisë zgjatet deri në anëtarësimin në Bashkimin Evropian
6	Këshilli i Ministrave nxjerr listën e detajuar të ushqimeve brenda 15 janarit 2027
7	Hyrja në fuqi dhe efektet nga 1 janari 2027

Cilat ushqime kalojnë në 6%?

Teksti rendit 14 kategori. Bukë dhe miell, qumësht dhe kos natyral, vezë, oriz, makarona, vaj ushqimor, mish pule, mish viçi dhe derri, peshk bazë, fruta të freskëta, perime të freskëta, bishtajore, sheqer dhe ushqime bazë për foshnja.

Lista e detajuar me kodet doganore del me vendim të Këshillit të Ministrave brenda 15 janarit 2027. Deri atëherë nuk dihet me saktësi cili produkt brenda një kategorie hyn dhe cili mbetet jashtë. Norma 6% zbatohet njësoj në vend dhe në import, dhe e drejta e zbritjes së TVSH-së së blerjeve mbetet e plotë.

Afati lë një dritare dyjavore në janar, kur norma është në fuqi dhe lista mund të mos jetë botuar. Përgatiteni kasën me kategoritë e ligjit dhe saktësojeni sapo të dalë vendimi.

Kush kalon nga 6% në 10%?

Ndryshojnë dy pika të normave të reduktuara. E para mbulon akomodimin në strukturat akomoduese, pra hotelet, bujtinat dhe strukturat e tjera të certifikuara. E dyta mbulon çdo shërbim brenda hoteleve dhe resorteve me pesë yje, me status special dhe markë ndërkombëtare. Pika për agroturizmin nuk ndryshohet, prandaj agroturizmi i certifikuar mbetet me 6%.

Sipas relacionit, efekti i përgjithshëm për buxhetin është negativ, rreth 1.6 miliardë LEK në vit. Norma 21% sjell rreth 10.6 miliardë LEK. Ushqimet kushtojnë rreth 12.8 miliardë LEK dhe akomodimi sjell rreth 593 milionë LEK.

Taksat kombëtare, karburanti lirohet dhe taksa e mjetit rritet

Projektligji ka 7 nene dhe një shtojcë të re. Ai heq taksën e qarkullimit prej 27 LEK për litër mbi benzinën dhe gazoilin. Bashkë me TVSH-në, barra tatimore mbi litrin bie me 32.4 LEK. Sa nga kjo arrin te çmimi i pompës varet nga tregu, dhe këtë e thotë vetë relacioni.

Për të mbuluar të ardhurat që humbasin, rritet taksa vjetore e mjetit. Formula mbetet cilindrata herë koeficienti i vjetërsisë herë tarifa fikse e karburantit. Tarifa fikse dyfishohet, nga 12.5 në 25 LEK për naftën dhe nga 10 në 20 LEK për benzinën. Mbi 2,000 cm3 ajo bëhet 26 dhe 21 LEK.

Mjeti	Sot	Nga 2027
Autoveturë naftë 1,600 cm3, 10 vjeçe	4,800 LEK	9,600 LEK
Autoveturë benzinë 1,400 cm3, 15 vjeçe	6,160 LEK	12,320 LEK
Autoveturë benzinë 1,500 cm3, 2 vjeçe	nuk paguan	4,800 LEK
Mjet elektrik	jashtë taksës	15,000 LEK
Automjet luksoz, taksa e përvitshme shtesë	21,000 LEK	40,000 LEK

Mjetet deri në tre vjeçe, që sot nuk paguajnë, hyjnë në taksë. Rimorkiot paguajnë 1 LEK për kilogram. Formulën e plotë, koeficientët për çdo moshë dhe kilometrat ku fitoni ose humbni i gjeni te taksa e mjeteve 2027.

Akcizat, kalendari i cigareve deri më 2033

Projektligji ka 5 nene dhe zëvendëson shtojcën e mallrave me akcizë. Për cigaret vendos një kalendar shtatëvjeçar, të njohur që sot.

Viti	Akciza për 1,000 fije	Pjesa në përqindje mbi çmimin
2026	7,750 LEK	nuk ka
2027	8,100 LEK	nuk ka
2028	8,450 LEK	nuk ka
2029	8,800 LEK	nuk ka
2030	9,150 LEK	2%
2031	9,150 LEK	3%
2032	9,150 LEK	4%
2033	9,150 LEK	5%

Nga 1 janari 2030 akciza e cigareve merr edhe një pjesë në përqindje mbi çmimin maksimal të shitjes me pakicë. Prodhuesit dhe importuesit e deklarojnë këtë çmim në Doganë të paktën 10 ditë para hedhjes në treg. Shitja mbi çmimin e deklaruar ndalohet. Akciza gjithsej nuk mund të jetë nën 90 euro për 1,000 fije.

Kalendarë të ngjashëm vendosen për duhanin me ngrohje, lëngjet me nikotinë dhe qeset me nikotinë. Lëngjet pa nikotinë për cigaret elektronike futen në akcizë, me 11 LEK për mililitër në 2027. Dieseli i përzier me bio taksohet për litër dhe jo për kilogram. Sipas relacionit, efekti për buxhetin e vitit 2027 është rreth 4.12 miliardë LEK.

Çfarë sqarojnë projektligjet e Paketës Fiskale 2027 nga ajo që dihej

Shtatë pika ishin të paqarta deri sa u lexuan tekstet. Tabela vë përballë atë që thuhej dhe atë që shkruhet.

Çështja	Çfarë thuhej	Çfarë shkruan teksti
Tatimi mbi fitimin	17% te drafti paraprak	Nuk preket, mbetet 15%
Norma e sipërme e pagës	32% te drafti paraprak	30%
Ushqimet me 6%	Rreth 54 produkte	14 kategori, lista e detajuar brenda 15 janarit 2027
Sponsorizimet	Zbritje deri 3% e të ardhurave	Nuk ka dispozitë
Pasqyrat financiare	Vetëm në QKB kur të punojë shkëmbimi elektronik	Vetëm në QKB nga pasqyrat e vitit 2027
Taksa vjetore e mjetit	Tarifat nuk diheshin	Formula dhe koeficientët janë te shtojca
Dividendi i fitimeve të vjetra	Pritej dispozitë kalimtare	Nuk ka dispozitë kalimtare

Katër veprime që nuk presin votimin

1. Vendosni brenda dhjetorit për fitimet e pashpërndara të viteve të kaluara, me ekonomistin tuaj.
2. Rregulloni llogaritë e ortakëve me kontratë të vërtetë huaje ose me kthim të shumave.
3. Përgatitni kasën dhe faturimin për normat 21%, 10% dhe 6%.
4. Llogaritni taksën e re për çdo mjet të biznesit dhe krahasojeni me kursimin te karburanti.

Pasqyrat e vitit 2026 dorëzohen ende në të dyja vendet, në QKB dhe te tatimet. Afati i pasqyrave nuk ndryshon.

Pyetjet e shpeshta

A janë ligj projektligjet e Paketës Fiskale 2027?

Jo. Janë depozituar në Kuvend dhe më 2 nëntor 2026 kaluan në parim te Komisioni për Çështjet Ligjore. Mbeten komisioni përgjegjës, votimi në seancë, dekreti i Presidentit dhe botimi.

Kur hyjnë në fuqi?

Hyjnë në fuqi 15 ditë pas botimit në Fletoren Zyrtare, me efekte nga 1 janari 2027. Pjesa në përqindje e akcizës së cigareve nis më 1 janar 2030.

A preket personi fizik tregtar?

Tatimi i tij mbi të ardhurat nuk ndryshon. E prekin norma 21% e TVSH-së, pragu i ri i regjistrimit në TVSH dhe taksa e mjeteve.

Ku dorëzohen pasqyrat financiare të vitit 2026?

Në QKB dhe te administrata tatimore, si deri tani. Dorëzimi vetëm në QKB nis me pasqyrat e vitit 2027, që dorëzohen në vitin 2028.

A paguajnë taksë mjetet elektrike?

Po, sipas projektligjit. Mjeti elektrik paguan 15,000 LEK në vit dhe motomjeti elektrik 1,000 LEK.

A mund të ndryshojnë ende shifrat?

Po. Komisioni përgjegjës dhe seanca mund të ndryshojnë çdo nen. Këtë faqe e përditësojmë pas çdo hapi, me datë.

Ku i gjej tekstet zyrtare?

Në këtë faqe, te kutia e dokumenteve në fund të secilit seksion. Janë 14 dokumente, të marra nga faqja e Kuvendit.

Baza ligjore

Ligji nr. 29/2023 “Për tatimin mbi të ardhurat”, nenet 3, 11, 24, 27, 41, 59 dhe 61. Te TVSH-ja, ligji nr. 92/2014, nenet 48, 49, 146, 155/3 dhe 159. Për taksat kombëtare, ligji nr. 9975/2008, nenet 3, 4, 5, 8, 9 dhe shtojca nr. 1. Ligji nr. 61/2012 “Për akcizat”, nenet 18, 78, 79 dhe shtojca nr. 1. Katër projektligjet e propozuara nga Këshilli i Ministrave, me relacionet përkatëse. Raportet e Komisionit për Çështjet Ligjore dhe Administratën Publike, datë 2.11.2026.