Çfarë është sh.p.k.

Shoqëria me përgjegjësi të kufizuar, e njohur shkurt si sh.p.k. ose SHPK, është forma ligjore e rekomanduar kur biznesi mbart rreziqe financiare, ka disa ortakë ose synon rritje dhe investitorë. Ortakët nuk përgjigjen personalisht për detyrimet e shoqërisë dhe mbulojnë humbjet vetëm deri në pjesën e kontributit të tyre në kapital.

Mund të themelohet nga 1 ose më shumë persona fizikë dhe/ose juridikë. Kapitali minimal është vetëm 100 lekë.

Karakteristikat kryesore të sh.p.k.-së

Kapitali minimal. Shoqëria me përgjegjësi të kufizuar nuk mund të ketë kapital më të vogël se 100 lekë. Kontributi i ortakëve mund të jetë në para ose në natyrë (pasuri të luajtshme, të paluajtshme ose të drejta).

Personaliteti juridik. Shoqëria fiton personalitetin juridik në datën e regjistrimit në QKB. Nga ai moment, shoqëria është person juridik i pavarur dhe përgjigjet me të gjitha aktivet e saj për detyrimet e veta.

Kuotat. Kapitali i regjistruar ndahet ndërmjet ortakëve në kuota, në përpjesëtim me kontributin e çdonjërit. Kuotat mund të kalohen me shitblerje, trashëgimi, dhurim ose mënyra të tjera të parashikuara me ligj. Statuti mund të kushtëzojë kalimin e kuotave, duke përcaktuar të drejtën e parablerjes në favor të ortakëve.

Shpërndarja e fitimeve. Ortakët kanë të drejtë të ndajnë fitimin e deklaruar në pasqyrat financiare, në raport me kuotat e zotëruara, me përjashtim të rasteve kur statuti parashikon ndryshe.

Struktura e drejtimit të sh.p.k.-së

Asambleja e përgjithshme

Asambleja e përgjithshme është organi vendimmarrës i shoqërisë. Mblidhet të paktën një herë në vit dhe merr vendime për çështjet kryesore si ndryshimi i statutit, emërimi i administratorëve, miratimi i pasqyrave financiare, shpërndarja e fitimeve dhe prishja e shoqërisë.

Vendimet për ndryshimin e statutit, zmadhimin ose zvogëlimin e kapitalit, shpërndarjen e fitimeve, riorganizimin dhe prishjen merren me tre të katërtat e votave të ortakëve pjesëmarrës. Vendimet e tjera merren me shumicë të zakonshme.

Lexo edhe: Si të dorëzoni pasqyrat financiare dhe vendimin e asamblesë në QKB.

Administratorët

Asambleja e përgjithshme emëron një ose më shumë persona fizikë si administratorë. Afati i emërimit nuk mund të jetë më i gjatë se 5 vjet, me të drejtë ripërtëritjeje. Emërimi prodhon efekte pas regjistrimit në QKB.

Administratori ka të drejtë dhe detyrim të administrojë veprimtarinë tregtare, të përfaqësojë shoqërinë, të mbajë librat kontabël dhe të paraqesë pasqyrat financiare vjetore.

Avantazhet dhe disavantazhet

Avantazhet

• Ortakët nuk përgjigjen personalisht për detyrimet e shoqërisë
• Kapital minimal prej vetëm 100 lekë
• Mund të ketë 1 ose shumë ortakë
• Tatim fitimi 0% për xhiro deri 14,000,000 lekë/vit (deri 2029, Ligji 29/2023)
• Prezantim më profesional ndaj partnerëve dhe institucioneve financiare
• Mundësi për të shitur shoqërinë si entitet të plotë

Disavantazhet

• Dokumentacion më i gjerë: statut, akt themelimi, vendime asambleje
• Kërkon asamble periodike dhe procesverbale
• Transferimi i fondeve nga llogaria e shoqërisë në llogarinë personale kërkon vendim asambleje
• Nuk mund të transferohet nga sh.p.k. në person fizik ose anasjelltas

Çfarë tatime paguan sh.p.k.-ja?

Shoqëritë me xhiro vjetore deri në 14,000,000 lekë paguajnë 0% tatim mbi fitimin deri më 31 dhjetor 2029, sipas Ligjit 29/2023. Mbi këtë prag, fitimi i shoqërisë tatohet 15%. Pragjet dhe mënyrën e llogaritjes i shpjegojmë te normat e tatimit mbi fitimin.

Tatimi mbi dividendin është 8% e shumës së fitimit të shpërndarë ortakëve, sipas nenit 59 të ligjit 29/2023. Si shpërndahet fitimi hap pas hapi e gjeni te faqja e dividendit, ndërsa rrezikun e tërheqjeve pa vendim te blogu për huanë e ortakut dhe dividendin e fshehur.

Administratori i sh.p.k.-së i punësuar në dy biznese i nënshtrohet tatimit mbi dy punësimet.

Detyrimet e tjera tatimore trajtohen në detaje te:

→ Legjislacioni tatimor

Lexo edhe: Person fizik apo sh.p.k.: cila formë ju përshtatet?

Shkaqet e prishjes së sh.p.k.-së

Shoqëria me përgjegjësi të kufizuar prishet kur mbaron kohëzgjatja e parashikuar, me vendim të asamblesë, me hapjen e procedurave të falimentimit, nëse nuk ka kryer veprimtari tregtare për dy vjet pa njoftuar pezullimin, ose me vendim gjykate.

Prishja ka si pasojë hapjen e procedurave të likuidimit sipas Ligjit Nr. 9901/2008 “Për Tregtarët dhe Shoqëritë Tregtare”, nenet 190-205.

Baza ligjore

• Ligji Nr. 9901/2008 “Për Tregtarët dhe Shoqëritë Tregtare” (i ndryshuar)
• Ligji Nr. 9723/2007 “Për Regjistrimin e Biznesit” (i ndryshuar)
• Ligji Nr. 29/2023 “Për tatimin mbi të ardhurat” (i ndryshuar)

Listën e plotë të legjislacionit gjendet te faqja e legjislacionit të QKB-së.

Pyetjet më të shpeshta për sh.p.k.-në

A mund të kem sh.p.k. me një ortak të vetëm?

Po. Shoqëria me përgjegjësi të kufizuar dhe aksionare mund të themelohen edhe nga një person i vetëm fizik ose juridik.

Cili është ndryshimi kryesor nga personi fizik?

Personi fizik përgjigjet personalisht me gjithë pasurinë e tij. Ortaku i sh.p.k.-së mbulon humbjet vetëm deri në vlerën e kontributit të tij në kapital. Sh.p.k.-ja është gjithashtu e vetmja formë që mund të shitet si entitet.

A mund të kaloj nga person fizik në sh.p.k.?

Jo. Ligji shqiptar nuk e lejon transformimin e drejtpërdrejtë të personit fizik në sh.p.k. ose anasjelltas. Duhet të çregjistrohet njëra dhe të regjistrohet tjetra si entitet i ri.

Sa shpesh duhet të mbahet asambleja?

Të paktën një herë në vit. Asambleja e zakonshme vjetore miraton pasqyrat financiare dhe vendos mbi shpërndarjen e fitimeve.

A mund të jetë administratori njëkohësisht edhe ortak?

Po. Administratori mund të jetë njëkohësisht edhe ortak i shoqërisë. Nuk ka ndalim ligjor për këtë.

Lexo edhe: Si të regjistrosh sh.p.k. në e-Albania

Lexo edhe: Person fizik apo sh.p.k.: cila formë ju përshtatet?