Çregjistrimi
i organizatave jofitimprurëse

Çregjistrimi i subjektit

Organizatat jofitimprurëse çregjistrohen nga regjistri elektronik në rastet e parashikuara nga ligji që përcakton rregullat për themelimin, regjistrimin, funksionimin, organizimin dhe veprimtarinë e organizatave jofitimprurëse, në rastet kur ligji parashikon prishjen dhe pavlefshmërinë e personave juridikë, si dhe në çdo rast tjetër të parashikuar nga legjislacioni në fuqi.

Çregjistrimi kryhet:
a) në mënyrë vullnetare me iniciativën e vetë organizatës jofitimprurëse;
b) në bazë të një vendimi gjyqësor;
c) sipas parashikimit të ligjeve të posaçme.

Çregjistrimi vullnetar

Kur vendoset shpërndarja nga vetë organizata jofitimprurëse, çregjistrimi nga regjistri elektronik i organizatave jofitimprurëse kryhet vetëm pasi vendimi i gjykatës për çregjistrimin e organizatës jofitimprurëse ka marrë formë të prerë.

Çregjistrimi me vendim gjyqësor

Në rastet kur gjykata vendos shpërndarjen e organizatës jofitimprurëse, çregjistrimi nga regjistri elektronik i organizatave jofitimprurëse kryhet vetëm pasi vendimi i gjykatës për çregjistrimin e organizatës jofitimprurëse ka marrë formë të prerë.

Të tjera për çregjistrimin

Të dhënat e organizatave jofitimprurëse të çregjistruara mbahen në regjistrin elektronik duke vënë shënimin “i çregjistruar”, si dhe numrin e datën e vendimit gjyqësor që ka vendosur çregjistrimin nga regjistri sipas ligjeve të posaçme. Këto të dhëna ruhen nga Gjykata e Rrethit Gjyqësor Tiranë në format elektronik dhe janë gjithnjë të aksesueshme për publikun.

Emri i organizatës jofitimprurëse ndalohet të përdoret dhe nuk mund të regjistrohet nga asnjë subjekt tjetër për një afat prej 6 (gjashtë) muajsh nga data e çregjistrimit.

NÇregjistrimi i organizatave jofitimprurëse nga regjistri elektronik ka si pasojë humbjen e personalitetit juridik të subjekteve.

Çregjistrimi nga regjistri i organizatave jofitimprurëse i degëve të organizatave jofitimprurëse të huaja, që nuk fitojnë personalitetin juridik nëpërmjet regjistrimit, ka vetëm efekt deklarativ.

Çregjistrimi në regjistrin tatimor

Për çregjistrimin e një OJF-je ndiqen hapat si më poshtë:

• Tatimpaguesi aplikon në Gjykatë për fillimin e procedurës së çregjistrimit.
• Pas marrjes së njoftimit nga gjykata, Administrata Tatimore verifikon situatën e tatimpaguesit në lidhje me përmbushjen e detyrimeve ligjore nga ana e tij (deklarimet dhe pagesat). Kur tatimpaguesi është me statusin “Aplikim per çregjistrim” mund të gjenerojë listëpagesën e fundit edhe në mes të periudhës tatimore, nga e- filing.
• Administrata Tatimore njofton Gjykatën për sa më sipër (konfirmon ose kundërshton çregjistrimin)

Në rast kundërshtimi nga Administrata Tatimore, Gjykata nuk procedon me çregjistrimin e subjektit deri në momentin e shlyerjes së detyrimeve nga ana e këtij te fundit.

Në rast konfirmimi nga Administrata Tatimore, Gjykata procedon me çregjistrimin e subjektit dhe vendimi i saj përdoret nga Administrata Tatimore për finalizimin e çregjistrimit ne Sistemin Tatimor. Data e çregjistrimit ne Sistemin Tatimor është data e vendosur në Vendimin e Gjykatës.